फर्की मेरै सानो बस्ती

फर्की मेरै सानो बस्ती जीर्ण तुल्य बाटो हेरे

नरम् जति बगी गए ढुङ्गा छोइ माटो हेरे

नौलो लाग्यो आफनै बारी खुम्चिएछ ठुलो गर्हो
अली उजाड् लाग्दा बस्ती भित्ता कान्ला पाटो हेरे

पीडा मात्र छैन बस्ती कतै धेरै मस्ती पनि
धनी धेरै माथी तर गरीबीको फाटो हेरे

किन यति पछि पर्‍यो नयाँ युग्मा मेरो बस्ती
छ की छैन साँझ पाक्ने डालीतिर आटो हेरे

मन थामी खुशी बाड्छु झर्न झर्न खोज्छ आँशु
नदेखिने आफै भित्र  आफनै मन्को गाँठो हेरे